اغلبية النساء يشرو العجينة المورقة جاهزة
بصح انا نحب نخدم كلش بيدي
واليوم جبتلكم طريقة صنع هذه العجينة في المنزل بالخطوات المصورة
بما انو هذا النوع من العجائن نستعملوه بزاف في شهر رمضان الفضيل
نبداو على بركة الله
اول حاجة نحضرو العجينة
1 كغ فرينة
فنجان تاع لاتاي زيت
ملح
ماء
نطمنو الفرينة بالزيت منبعد نضيف الملح ونلموها بالماء حتى نتحصلو على عجينة طرية
نحطوها في الثلاجة ترتاح من نصف ساعة الى ساعة
من جهة اخرى نجيبو المارغرين المخصصة للتوريق
ونخلوها في درجة حرارة الغرفة باش تولي طرية
انا استعملت هاذي
بعد ماترتاح العجينة تاعنا نجيبو الزبدة ونحوها من الكاغط نتاعها
ونحطوها داخل كيس شفاف ونخبطوها بالحلال حتى ترقاق
بهذا الشكل
نحطوها بجنب
ونجيبو العجينة نتاعنا
رايحة تكون ملساء وطرية
نرش الطاولة نتاعنا بالفرينة مليح
ونفتح العجينة ونخليها في الوسط شوية خشينة ونفتح مليح الجوانب
بهذا الشكل
نحط الزبدة في الوسط
ونغلق عليها من الجوانب
هكذا ونتأكد انو الزبدة نتاعي راهي مغلفة مليح
نفتحها بالطول مانرققهاش بزاف ومانخليهاش خشينة
ونطوي الجانبين الفوق ولتحت
نلاقيهم في الوسط
ونطويهم فوق بعضاهم هكذا
نغلفها كيما راهي بكيس ونحطها في الثلاجة ترتاح نصف ساعة
كي نخرجها نحطها بحيث تكون الفتحة من الجهة اليسرى
نشدولها دايما جهة معينة
ونعاود نفتحها بالطول
ونطوي كيما المرة اللي فاتت
ونغلفها بكيس ونحطها ترتاح في الثلاجة نصف ساعة
ونخرجها ونعاود نفس الطريقة
وهكذا نكون درت 3 مرات
يعني 3 tours
ملاحظة مهمة
كل مانجو رايحين نفتحو العجينة لازم نرشو الطاولة تاعنا مليح بالفرينة
وكل مانطوي لازم انحي الفرينة الزايدة فوق العجينة بالبانسو
لانو الفرينة هي اللي رايحة تخربلنا العجينة وماتخليهاش تتورق في الطياب
العجينة اللي رايحين نتحصلو عليها رايحة تعملنا كمية كبيرة
نقسموها على 3 قطع ونحطوها في الكونجيلاتور
وكي نحتاجوها نخرجو قطعة
شوفي كيفاش مورقة
ان شاء الله يكون الشرح وافي
واي استفسار انا في الخدمة
دعوة صادقة من القلب في هذا الشهر الفضيل تكفيني
تقبل الله منا ومنكم صالح الاعمال
ان شاء الله المرة القادمة تصوريلنا واش طيبتي بيها هكذا نأخذ فكرة منك
شرح كافي ووافي
انا ايضا معتمدة طريقة الاخت نوالو ربي يحفظها او يحفظك انت ايضا ابدعت
بالتوفيق وشكرا
بالتوفيق اختي
وراهو حاضر منبعد نحطو