اليوم عملتلكم لشوصون محشيين بالدجاج
العجينة
4 كيسان فرينة
1/4 كاس زيت
م ك خميرة الخبز
ملح
ونلموها بالحليب الدافئ
نتحصلو على هدي العجينة
نعجنوها جيدا ونحطوها في كيس بلاستيكي حتى تتخمر
وهدي بعدما تخمرت وتضاعف حجمها
نحلوها شوية رقيقة ونقطعو دوائر كيما في الصورة
ونكونو وجدنا الحشو انا استعملت حشو دجاج مع زيتون وفلفل وطماطم وتوابل بالضافة الى الفرماج
نضع كمية من الحشو فوق كل دائرة والقليل من الفرماج
ثم نغلق العجينة واذا تخافي تتحل اثناء الطهي ادهني الحواشي بالماء قبل ما تغلقي واضغطي عليها بالفرشيطة
نتحصلو على هذا الشكل
ندهوها بالبيض مخلط مع شوية حليب
نذرذرو عليها السينوج والجنجلان
نستفوهم في صينية مدهونة بشوية زيت ونحطوهم يطيبوا
وهادا شكلهم بعدما طابوا
اعملت معاهم جاري فريك وسلاطة والحميص بقالي من لعشاء تاع البارح
وهادا هو غدانا تاع اليوم
ان شاء الله ينال اعجابكم انتظر الردود
و إذا ممكن وصفة الجاري فريك
أحلى تقييم حبيبتي
الحشو: قلي شوية بصل وثوم ثم ضفي الفلفل مقكع كي يبدا يذبال حطي الدجاج مقطع قطع صغيرة وخليه حتى ينشف من الماء حطي الملح والتوابل وضفي الطماطم مقطع وكي ينشف تماما حطي شوية زيتون مقطع قطع صغيرة حركي شوية ثم طفي على النار وحطي المعدنوس
الجاري فريك: في برمة وعلى نار قليلة حطي اللحم انا استعمل البقري حتى ينشف من الماء ضفي البصل المرحي وشوية زيت وخليهم يتقلاو مليح ثم ضفي شوية من الحمص المنقوع ضفي الملح والفلفل الاسود وراس الحانوت والعكري الحار والحلو ثم ضفي الكرافس وشوية دبشة مقطعين وحبة او ثنين طماطم تكوني رحيتيهم وخليهم دائما على نار هادئة حتى ينشف الماء تاع الكماطم ثم ضفي الطماطم المصبرة وامرقي وكي تقرب اللحم يطيب حطي الفريك وخليه مدة حوالي نصف ساعة وطفي على النار لازم ما يكونش فيه الماء بزاف او عاقد بزاف ثم حطي النعناع اليابش وحركي انا ما استعملتش النعناع لانو راجلي ما يحبوش كي طفيت عليه حطيتلو الدبشة وخليتو وعند التقديم كذلك زينتو بالدبشة
نسيت نقلك قبل ما تطفي عليه بحوالي دقيقة حطي قرن فلفل حار