بعض النصائح لتمضية يوم نشيط بدون فراغ زائد, طبعا راحة الجسم والنفس مطلوبة, ولكن ننصح كل أخت أنو ما تأ جلش عمل اليوم للغد يعني لوكان عندها ماعين أوملابس متراكمين وتقول حتى غدوة ونغسلهم رايحين يكثرو عليك وماتصيبيش الوقت باش تكمليهم وراح تتعبي بزاااااااف نهار تجي تغسلي وهنا راكي تضيعي في صحتك وفي الوقت على هذا نقول لكل وحدة لوكان يكون عندك فنجان برك موسخ روحي اغسليه ماتعجزيش عليه وطبعا إذا كنتي مريضة لازم تريحي طبعا ماشي تفورصي على روحك .هاكذا باش تربحي الوقت وتنقصي على روحك التعب.
-كي تنوضي الصباح قولي هاذ الدعاء : الحمد لله الذي أحيانا بعد ما أماتنا وإليه النشور
وبعدها قولي أذكار الصباح:
واقراي سورة الكهف
فوائد التمر
إذا كان عندك التمر كليه أول ماتفيقي قبل لا تشربي القهوة نتاعك لأن الرسول الكريم وصانا بأكل التمر في الصباح وبعد إفطار الصائم قال رسول الله صلى الله عليه وسلم: " إذا أفطر أحدكم فليفطر على تمر ، فإنه بركة ، فإن لم يجد تمرا فالماء ، فإنه طهور " رواه أبو داود والترمذي .
وعن أنس رضي الله عنه أن النبي -صلى الله عليه وسلم- كان "يفطر قبل أن يصلي على رطبات فإن لم تكن رطبات فتميرات فإن لم تكن تميرات حسا حسوات من الماء " رواه أبو داود والترمذي . نظن فهمتو الحديث يعني اللي ماعندهاش تمر تشرب شوي ماء 
ومبعد القهوة نتاعك اشربيها بصحتك
وماتنساوش لاتأجلوا عمل الصباح للغداء يعني الكاس اللي شربتي فيه القهوة اغسليه فورا .
مابين الصباح ووقت الغداء كاين فراغ كبير يعيشوه بعض السيدات يعني اللي ماعندهوش صوالح متراكمين ما تخلوش الوقت يفوت غير هاكذاك استغلوه في المطالعة أو حرفة يد أو أي شيئ يفيدكم المهم ماتخلوش الوقت يفوت غير هاكذاك
لما يلحق وقت الغداء طيبي غداك نورمال وقبل مل تعملي أي شيئ ماتنسايش تقولي بسم الله حتة لو جيتي ترفدي صحن أو رايحة تلبسي حاجة أو أو أو… يعني لازم تقولي بسم الله دائما لكي يكون عملك كله بركة بإذن الله تعالى.
وماتأجليش عمل الغداء للمساء نذكر ونعاود .
وبصحتك الغداء 
وكيما قلت ماتضيعوش الوقت متخلوش الفراغ يعييكم اشغلوا نفسكم بأي شيئ وننصح كل وحدة ماتقعدش بزاف وحدها وتخمم لانو هاذ اللحظات يكثر فيهم التوسويس أعوذ بالله استغفروا ربي كثير في كل لحظة وفي أي وقت وحمدو ربي على كل حال في السراء والضراء وكيما يقولوا اللي الصبر مفتاح الفرج , وزيد هاذ الدنيا زايلة علاش نكسرو ريساننا معاها نقنعوا بلي كتبو ربي والفايدة واش تدي معاك لقبرك أمالا ماتقلقوش رواحكم هاذ الدنيا ماتستهلش وعيشوا حياتكم بساطة.
لما يلحق الليل بعدما كملتي صوالحك طبعا اقراي قبل ماتنامي شيئ من القرآن الكريم أو إستمعي له في الكيتمان او التلفاز او الراديو المهم ماتخليش يوم يروحلك بدون ماتقراي أو تسمعي شيئ من القرىن الكريم
هذا اللي عندي نقولولكم وتهلاو في رواحكم ولي رجعة في نصائح أخرى إن شاء الله تعالى.
سعيدة. عندك الحق يا حبيبتي كلو ولا التاجيل والله نندمو و نتعبو جسديا و نفسيا
انا الحق كنت ناجل لكن درت موقف و بدلت حياتي
ودرت جدول منظم ظرك نهبطهولكم تشوفوه و ما نا جلش عمل اليوم للغد
بارك الله فيك
مشكورة على الرد الرائع . كلامك كله صحيح