الطريقة اليومية للاعتناء بالمنطقة الحساسة 2024.

آهلا بسيدات و ببنات المنتدى

اليوم جبتلكم طريقتي في تنظيف آو الاعتناء بالمنطقة الحساسة

كاين بزاف بنات تقولك راهي فيا ريحة في المهبل ، راني نعاني من سواد في المنطقة ، راهي فيا حكة ، راه في حب في المنطقة و غيرها من المشاكل ، لكن سقسيتي علاه كل هذو المشاكل راكي تعاني منهم ، آكيد جراء الاهمال
متنسوش يا بنات المنطقة الحساسة كون تهمليها رايحة تجي فيها بكتيريا

رايحين تقولو واش قدنا نشرو مرطبات للجسم و لا مرطبات للبشر ، نعتاني بشعري و لا يدي و لا رجلي
نقولك حاجة ساهلة و متطلبش وقت كبير
نحتاجو لحاجات بسيطة

آولا كي تنوضي مع الصباح تدخلي للحمام تغسلي المنطقة بجال دوش آي نوع ، عن نفسي آنا نستعمل هذا ، آولا لآن ريحته مليحة و يوالم المنطقة و البشرة و يزيد اقتصادي و يشدلك

بعد ما تغسلي المنطقة شليها بماء فاتر و يكون مخلط معاه سائل طبيعي تكوني خدمته آنت بيدك و المكونات هي تجيبي قرفة مطحونة و توضعيه في كاسرونة ماء و تخليها تطبخ بعد ما تطبخ مدة نص ساعة تصفيها و ضيفي ليها ماء ورد + خل التفاح و منبعد تحطيهم في قرعة عادية و كل ما تبغي تغسلي ضيفي السائل للماء و الله ريحته تعطر

و بعد ما تغسلي تنشفيها بقماش قطني ( بعد استعمال القماش تغسليه بالصابون البلدي ، صابون الحجرة و تنشريه آمام الشمس )

و بعدها تجيبي مرطب آنا نستعمل هذا هو كاين آبيض ، آزرق ، وردي ، آنا يعجبني الآزرق ريحته تهبل

تحطي زوج قطرات في آصبعك آو على المنطقة و تمري ( قلت تمري يعني مدخليش قاع للمنطقة يعني تقدري تحطي في الجوانب برك )

و تحاولي تلبسي ملابس داخلية قطنية و تغيري كل مرة ماشي تقعدي بيها نهار كامل و لا يومين و تقدري تحطي فوطة يومية
حاجة متكلفش غير 5 دقائق و اذا لحقت
و كاين ملاحظة : كاين بزاف بنات و لا سيدات كي يخلو للحمام و يغسلو مينشفوش المنطقة نقولهم لازم كل ما تستعملي ماء في المنطقة نشفي اما بالمنشفة أو بورق الحمام لأن البكتيريا مع العرق و الماء و افرازات دير عش

عن نفسي نستعمل المنشفة في البيت و الورق في الخارج كي نكون في الخدمة و لا الجامعة

إن شاء الله يفيدكم الموضوع البسيط و المرة الجاية نديرلكم كيفاش يتم نزع الشعر من المنطقة الحساسة و الآدوات و الآلات لي نستعملوهم في ذلك