المحشي أو قلب اللوز بطريقة جديدة و ناجحة من مطبخي 2024.

السلام عليكن حبيباتي الكريمات ان شاء الله الصحة بخير جيتكم اليوم بطريقة جديدة في عمل قلب اللوز او كما يعرف بالمحشي الطريقة مختلفة نوعا ما خاصة في الحشو و النتيجة روعة جربوه واكيد راه رايح يعجبكم
اتركم مع الطريقة المفصلة و المرفوقة بالصور

المقادير:– 1kg سميد خشن
– 750g سكر عادي
– 100g سمن او زبدة ذائبة
– 1/4ل + كاس شاي (خليط ماء+ ماء الزهر)
– م.ص لفاني
– ½ م.ص ملح

للحشو:
– 400g كاوكاو محمص و مرحي رقيق
– 2م.ك كاكاو

للشاربات:
– لتر ونصف ماء
– 600غ سكرعادي
– 2 شريحة ليمون
– كاس شاي ماء الزهر

الطريقة:
– اول شيء نحضر الشاربات في كسرونة ندير الماء+ السكر+ شرائح الليمون و نخليه على نار هادئة كي يبدا يغلي نزيد مدة 15د ثم نطفي عليه و عندما يبرد قليلا نضيف ماء الزهر و نخليه بجهة

– للعجينة:
في قصعة واسعة ندي غربال متوسط الثقوب و نغربل السميد مع السكر و الملح و لفاني 3 مرات و كل مرة نخلط بيدينا حتى يمتزج السكر مع السميد جيدا و الحبيبات الخشنة اللي تبقى في الغربال نتخلص منها

ثم نبدا نرش بخليط الماء و ماء الزهر بالتدريج و نخلط في نفس الوقت باصابع اليد بلا مانعجن لازم الخليط يكون كيما الكسكس وحتى نتاكد بان الخليط تشرب الماء و ماء الزهر ناخذ كمية من العجين نضغطها على يدينا اذا تلمت على شكل كرة نتوقف

و هنا ندي كيس بلاستيكي نظيف و نحط الخليط بداخله و نغلق عليه و نخليه في اناء و نغطي عليه و نخليه يرتاح لمدة ليلة واحدة هذه العملية تساعد على ذوبان السكر و امتزاجه الجيد مع السميد

-في اليوم الموالي ندي صينية دائرية مدهونة بزبدة طرية جيدا ثم نشعل على الفرن و نخليه يسخن مليح ندي القصعة و نعاود نفرغ الخليط

و هنا نكون ذوبنا السمن نفركت الخليط بين يدينا من بعد نضيف عليه السمن او الزبدة و نبسس بين يدينا و هنا السيدة تشوف اذا كان الخليط ناشف و شرب مليح و يحتاج الى رشة ماء الزهر نضيف رشة خفيفة مانكثرش قيس ماتتلم العجينة بين ايدينا في هذه الاثناء ندي كمشة معتبرة من الخليط نخليها بجهة للحشو ثم يقسم الخليط الى نصفين متساويين

نحضر الحشو في اناء ندير كاوكاو + كمشة العجين + الكاكاو ونخلط الكل بلا مانعجن حتى تمتزج الكاكاو مع الخليط و يولي بني اللون و نخليه بجهة

ندي الصينية نفرش طبقة العجين الاولى و ندهنها بكمية قليلة من السمن دون ان نضغط عليها من بعد نفرش طبقة الحشو و في الاخير نفرش طبقة العجين المتبقية و هنا ماندهنهاش فقط نبسطها براحة اليد و نرسم خطوط بالسكين بلا مانقطع

و ندخلها للفرن مباشرة على نار متوسطة و نتركها مدة 15دالى 20د كي نشوف ان العجين تماسك قليلا و بدا ينشف هنا نخرج الصينية من الفرن و ندهنها مليح بالسمن و نعاود نرجعها تكمل طيابها حتى تتحمر من كل الجوانب و تدي اللون الذهبي الغامق .

– نطفي على الفرن و مباشرة كي نخرجها من الفرن نعاود ندخل السكين من الخطوط اللي رسمناها و نعمل فتحات صغيرة و نشربها بالشاربات اللي كانت محضرة ليلة من قبل و بردت مليح نفرغ كمية معتبرة كي نشوف بلي تشرب مليح نزيد الكمية المتبقية حتى نغطي وجه الحلوى و نعاود نرجعها للفرن نكون طفينا عليه و نخليها مدة 5د ثم نخرجها و نخليها في مكان عادي تتشرب مليح لمدة يوم حتى تتحصلي على نتيجة رائعة

و تقدم بالصحة و الراحة

ملاحظة:
– هذه الطريقة راهي رايحة تمدلك نتيجة و ذوق كيما قلب اللوز نتاع المحلات
– الاختلافات عن الطريقة الاصلية هي في سمكن راكم تلاحظو ان عملناه بعدما بات ليلة كاملة و كذلك طريقة تركه في الكيس مهمة باش يتشرب مليح

و هذا رابط الطريقة الاولى في عمل قلب اللوز

بارك الله فيك
وصفاتك دائما مضمونة و ناجحة
مشكووووووووووورة

خرجلك روعة حنونة
خسارة مانحبوش سينو كملت لك صينية كامل
مالا جو سوي جينيغوز نخليها للعضوات كريمات

شكرا لكن حبيباتي دايما منورين بالمشاركة الطيبة و العطرة ربي يخليكم دايما ليا