وصفة لكيفية طهي النقانق 2024.

السلام عليكم ورحمة الله ةبركاته كيراكم يا نواعم الجزائر ان شاء الكل يكون بخير على خير ارجومنكل وحدة منكم تعطيني وصفة نطيب بها المرقاز وواش نحطو معاه وسمحولي ماعندي وين عليكم

وعليكم السلام حبيبتي المرقاز انا عن نفسي
مرات فقط نسخن المقلة ونحطه يتقلا فيها اكيد بدون اضافة لا زيت ولا شي اخر
ومعاه نقلي بطاطا وبالصحة والراحة
ومرات تاني نعمل معاه بطاطا بوري تجي تهبل تان
وفي الشتاء نطيبه مع لوبيا ويجي بنين فيها
ولكن كي تكون قريب طيب اللوبيا نضيفه لها لان هو يطيب بسرعة ويعطي بنة هايلة
ومرة عملته مع خضار في الفرن ولكن بصراحة ماحبيناش طعم الخضر تغير طغى عليه زيت المرقاز
وان شاء الله لبنات يزيدوا يفيدوك اكتر حنونة

شوفي اختي خذي المرقاز وحطيه في بلا فور ودخليه للففور حتى بطيب شوية ثم نقصي منو سوية هذاك الزبت لي طلقو .في المقابل تكوني حظرتي صلصة الطماطم مداوية مليح و اقلي بطاطا دوائر . ديري البطاطة في الصنية ثم المرقاز ثم الصلصة و رشي المعدنوش ودحلي للفرن تزيد تطيب شوية وبصحة والهناء.
ملاحظة ادا حبيتي تعملي اكثر من طبقة جربي و ان شاء الله يعجبك

شكرا لك اختي هنا نور الله يحفظك ويعطيك ما تتمناي وشكرا لك على زيارة صفحتي

صحيتي اختي زوجة غني الله يفتح عليك انا اول مرة نسمع بهذي الوصفة وثاني نتاع اللوبيا للاخت هنا نور شكرا لك على المساعدة

ديريه مشوي فوق الجمر يجي يهبل أممممم
خاصة لوكان تكونوا في خرجة مع العائلة
أنا أكثر شيء نعمله مع بطاطا بوري
أو مع اللوبيا

شكرا لك اختي ماريا الحلو اسال الله العظيم ان يحلي ايام ويطرح البركة فيك وفي اولادك امين يارب العالمين

حبيبتي انا نعمله كيما قالت هنانور نسخن فقط المقلة ونحطه فيه يتقلى دون اضافات ونعمله مع ليفريت و لا بوري ومقرونة بصوص تومات ولا سباقيتي و كاينة طريقة وحد اخرى عملتها حورية المطبخ على شكل غراتان تاخدي بطاطا مقلية (كمية قليلة)+مرقاز مقطع +5 بيضات +ملح +فلفل اسود+ثوم +قلل من زيت الزيتون وتخلطيهم برفق ونفرغيهم في المول انتاع الفرن وتخليهم يطيبوا يجي غراتان ساهل وبنين وانا جربته من قبل يجي هايل

انا انديرو كيما الاخت هانا وساعات كيعود المرقاز مخدوم غير باللحم يعني مافيه ليدام انقطع البطاطا كلي رايحه نقليها بصح خشينه شويه ونحطها في لاكوكوط مع شويه ملح وثوم وفلفل اكحل ونحط فوقها المرقاز وقدر نص فنجال ماء ونسكر عليه مدة 20د لى نصف ساعة على نار هادئة ونقدمها اتجي هائلة وماتديش الوقت وعندي طريقة اخرى والي هي نحي حبات مرقاز انحيلهم الغلاف هذاك ونقليهم شويه ونحي لزيت الي خرج من ونحط عليه لاصوص انكون محضرتها بالطمام سواء مصبرة ولا حبات ونضيفلها شوية ثوم وفلفل اسودوالتوابل والي يحب الحار انضيف فلفل اخضر ودبشة ونخليهم ايطيبو مع المرقاز الي كنت قليتو ونقمو مع بطاطا مقلية ولا لابيري

أختي كي تديري المرقاز في الغراتان تقليه و تقطعيه
أو تديريه بدون طهي و تقطعيه