مرحبا بكن جميعا خواتاتي سيداتي الكريمات
لكن اليوم جيتكم بطريقة سهلة و ناجحة و مضمونة و الشيء الاجمل فيها انك لا تتقيدي في المقادير بالغرامات فقط تعتمدي على عبر او كيلة معينة و تكملي بيها جميع المقادير
– بحيث انا هنا على حسب الصينية اللي عندي عبرت بكيلة صغيرة و المقادير هي
– 3 كيلات سميد خشن
– 2 كيلات سكر عادي
– كيلة ماء الزهر ( نوعية جيدة)
– تقريبا نصف كيلة سمن ذائب و دافيء
– قرصة ملح
– للحشو كيلة لوز او كاواكو محمص و مطحون + حبات لوز للتزيين يمكن الاستغناء على الحشو ليس ضروري
للشاربات
– 3 كيلات ماء+ ماء الزهر ( 2 كيلات ماء + 1 كيلة مخلطة نصف ماء و نصف ماء الزهر)
– 1 كيلة سكر
– شريحة ليمون
– ملاحظة : هنا الشاربات نتحكم فيها على حسب نوعية السميد اذا كان من النوع اللي يشرب نضاعف مقادير الشربات
الطريقة :
– اول شيء نحضر المقادير في قصعة او ليان كبير ندير السميد + السكر + رشة الملح و نخلط الكل بيدينا حتى السكر مايوليش يبان مع السميد
– من بعد نضيف ليدام سمن او زبدة و نخلط باصابعنا بلا مانعجن و نزيد نشمخ بالماء الزهر و نخلط بلا مانعجن ايضا و كانك تحضري الكسكس و هنا لازم تحسي الخليط كانو جاري اذا شفتي السميد ضفتيلو كيلة نتاع الماء الزهر و بقا ناشف زيدي شوية ماء الزهر حتى تحسي بلي الخليط راه جاري شوية لان السميد من بعد راهو رايح يتشرب و هذا من بين اسرار نجاحو و نوعية السميد تختلف من بعد تدي صينية و تدهنيها بزبدة طرية
– هنا نقسم خليط السميد على قسمين اذا كان هناك حشو و اذا لم يكن نفرغ الخليط مباشرة انا هنا استعملت حشو ندير نصف كمية السميد و كيما رانا نشوف في الصورة كي توضعي السميد في الصينية حطي بالكمشات حتى تغطي سطح الصينية بلا ماتضغطي أي كيما نقولو فركتيه و هذا ايضا من بين اسرار نجاحه من بعد ديري طبقة اللوز و زيدي غطيه بكمية السميد المتبقة بنفس الطريقة الاولى بلا ماتضغطي و في الاخير براحة اليد بسطي سطح العجينة بلا مانضغط و نسويها على الاطراف
– نرسم خطوط بالسكين بلا مانقطع أي بلا مانوصل السكين الى قاع الصينية و نزين بحبات اللوز و نغطي عليه و نخليه يبات ليلة كاملة و نطيبوه في اليوم الموالي و هذا ضروري لنجاحه
و نروح نحضر الشربات نوضع جميع المقادير في كسرونة على نار متوسطة و كي يبدا الخليط يغلي هنا نركز على هذه الملاحظة نحسب 5 د بعد بدأ الغليان و نطفي عليه و نخليه بجهة
– في اليوم الموالي نسخن الفرن ندهن قلب اللوز بالسمن او زبدة ذائبة باش يتحمروندخلوه للفرن نخليه على نار متوسطة كي نشوف بلي جوانب الصينية تحمرو نطفي عليه و نشعل للفرن من الفوق و نخليه يتحمر مليح حتى يدي اللون الذهبي نخرجوه من الفرن و مباشرة و هو ساخن نسقيه بالشاربات باردة اللي كنا حضرناها يوم من قبل و هنا نطفي على الفرن و نعاود ندخلوه للفرن و نغطيه بصينية و نخليه مدة 10 د داخل الفرن الساخن لكن يكون طافي حتي يتشرب مليح و هذا ايضا من بين اسرار نجاحه و بعد مرور 10 د نخرجوه و نخليه في مكان عادي
– لا يقطع الا بعد مرور 3 ساعات على الاقل و يقدم بالصحة و الراحة
على الطريقة المفصلة
انا نخدمو تقربا كما هاك ولكن يجيني شوية يابس
وين المشكل
شككككككرا
راها تشي مي يخصني الكوشة ما عنديش
عندك الصح رمضان راه قريب نجربه انشاء الله