مساء الخير اخواتي الكرام انا كملت قرايتي في 2024 ولدوك مازال ما خدمتش وهدا الامر يؤرقني خاطر كل لتخرجو ا معايا خدموا وسهلهم ربي وتزوجوا وانا لي تمنيت منصب عمل نعين بيه روحي والو فالولي ماكيش تحوسي مليح حطي ل cv حطيت كيما قالو ولكن لحد الان ماكنش لي عيط وقالي علا الخدمة زاد الهم عليا من هاد الناحية وتوترت واصبحت امي كدلك تخمم عليا وانا نشكيلها كل يوم ونفرغلها قلبي وهي كي تشوفني هاك هداك وتزيد تتحير عليا وانا مليت لقعاد في الدار كلشي في شغل الدار حفضدتوا وتعلمتو طبخ حلوى باه ننسى مافدرتش راني حاسة قاع مراكب ناس تمشي وانا حابسة مع لعلم بلي عايشة في بلاصة تاع خدمة ولي زاد طين بلة كي نخرج لبلاصة مثلا للتسوق او مناسبة معروصة ونتلافى لي نعرفهم يزيدوني ماكنش منها ملقيتيش خدمة لدوك كاين نولي لدار مانضويش ونفرغ غير في ماما مسكينة هي كرهت وانا كرهت
وكيما سبق وقولت صحاباتي قاع تزوجوا راني حاسة بالوحدة والخيبة في وسطهم اشيروا علي ولي محرومة من حاجة ربي يفرحها في اقرب وقت
أختي ما تتقلقي ما والو و الحاجة اللي راكِ حابة خدمة و لا زواج ادعي ربي نوضي صلي في الثلث الأخير من الليل و ادعي ربي يحققلك واش في بالك و كيما يقولوا الرزق على ربي ماشي حتى على واحد
متعمريش راسك و تشوفي برك الامور السطحية شوفو اوفو اسكو راهم هانيين
اسكو تحصلو على هاديك الخدمة بطرق شرعية………
ماتقطعيش لياس اونبلوس ماعندكش بزاف ملي تخرجتي
كاين دي كا و الله من 2024 و 2024 راهم بلا خدمة
اكثري من الدعاء و الاستغفار و ربي لا يضيع اجر المسلمون
ربي ما يبلع باب حتى يحل عشرة
خمي في اللي راه جاي بالاك خير منهم و كتر
و ماماك مسكينة ماتبينيلهاش بلي راكي زعفانة لعبي و ضحكي نورمال
اضحك للدنيا تضحك لك
سلام
ربي العالم بواش راه مخبى لك
ممكن ربي شايف من مصلحتك متلقيش خدمة ضوك
عسى أن تكرهو شيئ وهو خيرا لكم
انت اللى عليك درتيه المهم قريتى وتعلمتى واجتهدتى والحمد لله تخرجتى
والباقى خليه على ربي
متلومي روحك متقولى زهر ربي العالم بكل شيئ وكلش دار لو حكمة
متدري منا لغدوة واش راح يصرا وجامى تقارنى روحك بالاخريات
ممكن انت خير منهم بألف مرة
حبيبتى اشتغلى وقت فراغك هدا في امور تفيدك زيدي ديري دورة تدربية
زيدي نمى ثقافتك وياماك انت اللى لازم تصبريها
وربي يوفقك ويوفقنى ويوفقك الجميع
و عليكم السلام و رحمة الله تعالى و بركاته
أختاه لقد قال : و بشر الصابرين
كل واحد و كيفاش عايش الصبر ثم الصبر
و خير دليل بنت عنابة 3 شهادات : ليسانس فلسفة + تقني سامي كاتبة مكتبية لدى محامي + شهادة مراسلة صحفية = البطالة تكاد تقتلها
راني مرة هاك و مرة هاك
خطرا مستخلفة خطرة قاعدة في الدار و نشوف الي هم اقل مستوى مني بخدمتهم
هذا مكتوب ربي و نزيدك مخطوبة من 5 سنوات و ما زلت في دارنا
هذي هي الدنيا و هذي هي احوالها
خالينها على ربي
نديرو الي علينا و نستو من خالقنا يحقق امانينا
استغفري و صلي و اطلبي ربي و لي فيها الخير ربي يجيبها
متنسيش و لا تقنطوا من رحمة الله
كان الله معك حبيبتي
اختي الفاضلة صاحبة المشكلة ….اسمعيني جيدا لعلك تعين ما ساقوله لك ….
لكل انسان منا مهما كان كوب نصفه مملوء وانصف الاخر فارغ …اما صاحب الكوب فينظر للنصف الفارغ دوما فتراه يردد دوما ينقصني كدا واعاني من كدا وكي اكون سعيدا يجب ان يتحقق لي كدا ….
اما الناس الاخرين فلا يرون من الانسان المقابل الا النصف الممتليء …هده لها زوج ادن هي سعيدة الاخرى درست ادن هي متعلمة…توظفت ادن لها مال ….انها عزيزتي مجرد تخمينات …
عزيزتي ان الانسان يؤجل سعادته بيديه حين يربطها بوظيفة او زواج ….رغم اني لا اقلل من شانهما فلا تكوني منهم …افعلي اللازم ثم دعي النتائج لله …
بانتظار ان يتحقق لك ما تريدين خدي معك ما تيسر من اكل وزوري ايتاما بدور الطفولة المسعفة او عجزة محرومين او مرضى مبتلين وارسمي بقلبك الحنون البسمة على شفاههم ثم قولي الحمد لله انا بخير …نامي وانت سعيدة لانك ستكونين كدلك …سباقة للخير مرضية للرب ….سترين ان الله اعطاك فرصة لفعل الخيرات قد لا تتاح لك بعد الزواج والارتباط …لا ترهني وقتك بالغد فهو لله..الان والان فقط بامكانك ان تتحركين دوري بفلكه سيكون لك …سيرزقك خير مما تطلبين …فقط كوني واثقة …
نصيحتي الاخيرة لا تطلبي وظيفة بعينها المهم اعملي ولو حلويات او ما تتقنين الدكي من يتقن فن الصعود ….
اسفة على الاطالة …