واش راكم سيداتي الكريمات
نتمنى الكل راه بخير
جيتكم اليوم بغراتان اقتصادي و بسيط و هو غراتان معكرونة باللحم المفروم طريقة تحضيره راهي سهلة و ماتديش وقت اليكم الخطوات
المقادير:
– لحم مفروم حوالى 200غ الى 250 غ + حبة بصل كبيرة مفرومة + م.ص سمن+ م.ص زيت+ توابل
– كيس معكرونة
– كمية معتبرة من الجبن المبشور
– صلصة بيشاميل خفيفة ( 1ل حليب/ 80غ زبدة/80غ فرينة + جبن + توابل )
– التوابل : ملح/ فلفل اسود / جوزة الطيب / قرفة
الطريقة:
– أول شي ندي قدر ندير بيه ماء+ قليل من الزيت و الملح و عند بدا الغليان نضيف عليه المعكرونة نغليها بعد الغليان نصفيها و نشللها بماء عادي و نخليها على جهة تقطر
– في مقلاة نحضر اللحم المفروم كيما في حشوة البوراك بحيث نحط البصل المفروم و نزيد اللحم المفروم + شوية ملح و شوية فلفل اسود وشوية قرفة +سمن+زيت و نخلي الكل على نار هادئة يتقلى و نحرك من حين الى اخر حتى يتقلى مليح
– بعدها نحضر صلصة البشاميل في كسرونة نذوب الزبدة مع الفرينة حتى تتحصلي على عجينة نحمصها شوية بعدها نفرغ عليها الحليب يكون ساخن بالتدريج و نحرك بالفوي بسرعة حتى ماتتبركسش لازم تتحصلي على صلصة خفيفة ماتكونش ثقيلة و في الاخير نضيف قليل من الملح و الفلفل الاسود و جوزة الطيب بودرة + كمية من الجبن الميشور و نخلط الكل
– ندي صينية الغراتان ندهنها بالزبدة و نفرش عليها طبقة خفيفة من صلصة البيشاميل و في اناء نخلط المعكرونة مع اللحم المفروم مع صلصة البيشاميل المتبقية مع قليل من الجبن المبشور و نخلط الكل و نفرغه في الصينية بعدها نذري عليه كمية الجبن المبشور المتبقية
ندخله للفرن حتى يدي اللون الذهبي و يقدم بالصحة و الراحة
يمممممممممم تسلم يدك
كالعادة أميرة
دائما متألقة و أميرة حقا في وصفاتك
مشكووووووووووووورة
دائما متألقة و أميرة حقا في وصفاتك
مشكووووووووووووورة
مشكورة عزيزتي…..باينة تشهي وروعة
واش يا اختي رانا دايرين الرجيييييييم,تهلاو فينا شوي…ههههه
ننتظر المزيد……
والطبق نال اعجابنا الله يبارك ساهل ماهل ومشكورة ولادي يموتو على المقرون فحين نعرف اولاداناس يكرهوها شويه ولازم دخلي فيها هكا صوالح باش ياكلوها
ممممم شهي
تسلم ايدك
تسلم ايدك
مشكورة على الوصفة ……..حتى انا حرت اليوم واش ندير عشاء بصح دبرتي عليا ربي يحفظك
جاتك روعة يعطيك الصحة اختي
تسلمي اعشق هدا الطبق