واش هي الاطباق المميزة و البنيييينة لي ديريها في عيد الاضحى 2024.

السلام عليكم
بنات يا لحبيبات يا لحنونات حبيت من خلال هاذ الموضوع تحكيلنا كل وحدة على الاطباق لي ديرهم في عيد الاضحى و لي حقا حقا بنيييييييينة
افيدونا يا صاحبات الانامل الذهبية باه ناكلو حاجة نبقاو دايمن نتذكرو طعمها البنيييييييين
انتظر

عيدك مبروك سماح نديرو الروتي المحمر البرقوق و العنب الطعاااااااااااااااااااااااااااام و كانش ما نزيدو

رايحة نبدا بحاجة بسيطة سهلو و بنينوة و سهلة للهضم
جيبي قطهة لحم افرميها و ديريلها شوي دبشة و كسبر و فلفل اسود و ملح و شوييييي من البيضو مع صوص تاع كاشي مرقة و اخدميهم على شكل خبيزات صغار و حطيهم فوق صفيحة على النار اشويهم و بالصحة و لهنا
هكذا ماتتعبش المعدة مع الهضم……راكم تعرفو العيد

صح عيدكم كاااااامل

صح عيدكم

السلام عليكم و صح عيدكم مسبقا
أنا نهار العيد نود صباح و ندير مسمنة نتاع الزيت باش نشربو قهوة الصباح من بعد يروح راجلي يصلي صلاة العيد و من بعد كي يجي يدبح الأضحية و نبدا أنا نغسل الدوارة و من بعد نشوط بوزولوف و نغسلو و من بعد نخلي اللحم ينشف و نغطيه بالفينة و كي نكملو و نقو الحوش من هذاك الدم ونبدا نوجد في المجمر باش نشوي و نعملو ملفوف و نوجد الطاولة بالسلاطة و البصلة و الزيتون و الليموناد من بعد نفطرو و نريح شويا و نعاود نود باش ندير العصبانة و نقسم هذاك الراس و ندسه في frigo و نبدا نخيط في العصبانة حتى لي نكمل و هذا هو العيد نتاعنا نفوتوه نهار شباب و كيما كل عام انشاء الله…و صح عيدكم كامل

بعد مايرجع زوجي من صلاة العيد يذبح الكبش أنظف الدوارة والبوزلوف ثم نقلي شوية كبدة مع سلاطة أما العشاء نديرو العصبان والبوزلوف

شكرا على مروركن…………….اين البقية هيا كاشي اطباق مميزة باللحم تاع العيد

أنا ندير عادات دارنا ونفسهم عند عجوزتي في اليوم الثاني أنوض أنا وزوجي باكرا نقسمو اللحم نطيب جزء قد الضياف وثاني حق ماندي معايا كي نروح عند الأقارب طبعا يكون مرفوق بالكسكس ساعة الثمنة بالكثير يكون واجد بعدها نروح عند عجوزتي وجدة زوجي ونرجع للدار وفالمساء نديرو الشواء أو نروح لدارنا ونخلي الشواء لليوم الثالث

اولا صح عيدكم كباقي النسوة الجزائريات نوض بكري نلبس لولاد حوايجهم ونكون محضرة كل شيئ من البارح من ميناج وحلوى وغيرو .بعد ماندبحو اول حاجه نشوط الراس والرجلين ونغسلهم ونخبيهم ينشفو باش نديرهم في الفريجيدار ومن بعد نروح للدوارة والكرشه نقيهم مليح ونقطعهم شوي شوي ونديرهم يغليو شوي في الخل باش تروح مهم الريحه يتغلاو غير قيس 5د المهم يديرو رغوة من فوق البرمه ومن بعد نضفيهم في كسكاس ومن بعد نخبيهم في الفريجيدار وبعد العيد بايامات ندير بيهم بكبوكة بالحمص تجي تهبل الله يبارك.ونكون درت على الصباح مطلوع وحميس .وراجلي هو اللي يتولى تشعال الفحم وتقطيع الكبده والقلب ووووو.من الاعضاء هدوك وانا نكون نظف في المكان وفي هديك الحالة بعد مانتغداو .ريح شوي ولعشيبه نقعو اللحم ونخبيو اللي يتخبا ونمدو اللي نمدوه وهكذا اما اهم حاجه طلبتيها منا الاخت انا عن عائلتي اكلتنا المفضله في ايام العيد هي الشوا على الفحم .ومن بعد كل يوم نديرو حاجه ماشي معينة يعني مرة بربوشه ومرة شخشوخه ومرة طراف لحم وحدهم في لاصوص مع كاش فريت وحميس وهكا المهم صح عيدكم وكل عام وانتم بخير