المقادير
للمرق او الصوص
حبة بصل كبيرة مرحية+1 سنة ثوم زيت +ملح+كسبر مرحي+فلفل اسود+ شوية دبشة +معدنوس مقطعين وجلبانة انا استعملت 1كلغ
للاعشاش
قرنون وكاين اللي يسميه خرشوف كيما مكتوب في العلبة خرشوف حسب افراد العائلة انا استعملت المجمد لاني مالقيتش الجديد في المحل لكن القرنون الطبيعي خير من المجمد ويطيب بسرعة على عكس المجمد اللي يطول في طيابو
الحشو:
250 غ لحم مفروم وممكن اكثر حسب الكمية نتاع القرنون اللي عندك +بيضة +2سنات ثوم+شوية معدنوس مقطع+ملح وفلفل اسود
50غ فروماج نتاع ميزان نوع باربار تقطعيه الى مربعات
كمية من الزيتون الاخضر اللي تكوني نزعتي منو الملح
فروماج روج او قرويار رابي
التحضير
في كوكوط حطي الزيت والبصل والملخ والكسبر والفلفل الاسود وشوية دبشة او ومعدنوس مقطع
قليهم شوية ومرقي بالماء نحي شوية من الصوص هادي وحطيها على جنب وزيدي كمية الجلبانة وحفنة من الزيتون اغلقي الكوكوط وخليها تغلي ثم نقصي النار وخليها على نار متوسطة من ساعة ونصف حتى ساعتين لاني بصراحة نفضل الجلبانة اللي تجي ذايبة
في هدا الوقت خلطي اللحم المرحي مع البيضة والثوم والملح والمعدنوس والفلفل اسود
اعملي شوية كويرات زيديها للمرق وخليها تطيب مع الجلبانة
اما كمية الصوص اللي احتفضتي بيها حطي فيها كمية القرنون على نار هادئة حتى تطيب الحبات وتولي طرية
نحيها وخليها تبرد
جيبي الكمية المتبقية من الزيتون المغلي انا مانغليهش نديرو في الماء تقريبا اربع الى خمس مرات كل مرة نشلو و نبدلو الماء
اقسمي كل حبة زيتون على 2 من غير ماتقطعيها ولصقيها في قطعة الجبن وزيدي لصقي واحدة مقابلها بنفس الطريقة
ديري شوية من الفروماج روج او القرويار
وفوقو قطعة الجبن والزيتون
وغطي بقرصة من اللحم المفروم
كملي بنفس الطريقة مع باقي الحبات في صينية الفرن حطي المرق اللي طاب فيه القرنون وحطي حبات الخرشوف ودخليها للفرن على 220 درجة 20دقيقة
كي تطيب خرجيها وغلفي وجهها بالجبن المبشور ورديها من فوق ختى يذوب ويولي لونو ذهبي
كي تطيب الجلبانة ويولي مرقها قليل وخاثر حطيها في صحن التقديم وفوقها حبات القرنون وزيني بالمعدنوس وشرائح ليمون
و بالصحة و الراحة نتمنى تعطوني رايكم بصراحة
ههههههههه
بصحتكم وطريقة جميلة ومنظرها تشهي احلى تقيييم يستاهل الطبق
ما شاء الله
بصحتكم حبيبتي
في انتضار ابدعات اخرى منك
بارك الله فيك
لكن ارجو وضع اسمك و اسم المنتدى على الصور حتى لا تنسب لغيرك