حالتي حالة يالبنات 2024.

السلام عليكم ورحمة الله وبركاته

البنات اليوم راني في حالة من ابني انيس
البارح حكماتوا وحد الكحة مانقلكمش ديتوا لسبيطار وعطاوه الدواء وكي شربوا شوية تنحاتلوا بصح كي وصل الفجر زادت ولاتلوا كيما قبل وكي يرتاح يقعد ماكسيموم شهر ويزيد نفس الشئ هو يدخل الشتا وانا نبدا نعاني معاه عندو حساسية صدر شوية تع هوا يقيسوا يبات في حالة والله مسكين يغيضني وقلبي يولي يتقطع وزيد عاقل وكي يمرض بالكحة يولي غير يبكي مليت من الدواء لي عاد يشربوا كي الماء
حبيت نقلكم يامهات كاش حاجة تعرفوها ولا دواء عرب ولا لي حالة ولدوا كيما ولدي يقلي ولا نصيحة من عندكم وتلقاوها في الجنة ان شاء الله وعمر ولدي 5 سنوات

الله يكون معاك ولكن للاسف ما نعرف حتى حاجة ربي يشافيه من دعواتنا انشاء الله

ربي يجيبلو الشفا انشاء الله بنك مسكين عندو حساسية بصح لازم داويه لخاطر بعيد الشر هاذي الحساسية تولي ربو مالا ما تستهزايش فيه انا بناتي كي جيهم الكحة نخلطلهم شوي زيت زيتون وشوي كمون ونوكلهولهم مليح للسعلة وكاين دوا عر واحد اخر كانت ديرو ما لولادي نسقسيها عليه ونرجعلك لخبر وربي يشافيه

نعرف طريقتين تستعملهم امي لاولاد اخي هي ترحي البصل وتشربيه الماء نتاعوعلى الريق 3ايام والبصل ديريه لبخة على راسو
والثانية تجيبي ثوم وتقطعيه وتحطيه على العسل الحر 2 مغارف مدة 2س الى 3س ونحي الثوم وخليه يشرب العسل ان شاء الله تستفادي

الله لا يحرمني منكم اخواتي نورهان وسما وروزالينا نجرب واش قلتولي وراني ديتوا لطبيب ونسويفي فيه بصح والووو راني قلتلكم الدواء يرتحو فترة برك ويولي كي قبل

انا حسب ما كنت نشوف زوجة اخي الي عندها زوج بنات وش نقولك محنة مع يدخل الشتا يعيشو عند الطبيب كل يوم عندو حتى الي قالولها ديريلهم الكرموص مع زيت الزيتون وكل صباح فطريهم عليه ع الريق والله غير تنحاتلهم هذيك الازمة الي كانو فيها بصح راني عيطتلها وقاتلي كيفاه يديروه

شوفي ياك تعرفي الكرموس بالاك ما تسميوهش كيفنا
التين وهو يابس تحكمي تنقيه وتفوريه وتحطيه في بلارا نتاع زجاج وتحطي فيه كمية نتاع زيت الزيتون حتى يتغطى كامل وخليه مدة يومين ولا ثلاثة حتى يولي طري شوي وكل صباح اعطيه ياكل منو شوي وتاني شربيلو من هذاك الزيت الي فيه ونشا الله بالشفا عليه

ربي يجيبلو الشفاء الاخوات ما قصرن..المهم هذه الحساسية تبعي طبيبه ولا توقفي الدواء مهما كان الامر و ابقي شربيو زيت زيتون و العسل على الريق
ونقصيلو الاستحمام في هذا الفصل …ولبسيه مليح كي يخرج للدراسة وان شاء الله طهور