الحمد لله و الصلاة و السلام على رسول الله
السلام عليكم و رحمة الله تعالى و بركاته
المقادير:
للعجينة:
ـ 250غ فرينة.
ـ 125غ ماغرين.
ـ 2 مغارف كبار سكر رطب.
ـ 2 مغارف كبار زيت.
ـ 2 مغارف كبار حليب.
ـ صفار بيضة.
ـ فاني.
للكريم باتيسيير :
هاذ الكريمة اقرب تسمية لها هي كرام ديسار لكن ممكن ايضا نستخدمها كريم باتيسيير
ـ 2 بيض.
ـ فاني.
ـ 4 ملاعق كبار سكر عادي.
ـ 2 ملاعق كبار و نص مايزينة.
ـ 500مل حليب.
للتزيين:
فواكه حسب الرغبة.
ناباج.
طريقة التحضير:
اول حاجة نجهز العجينة
نحط في إناء الفرينة و نضيف عليها المارغرين باردة و مقطعة مربعات و الفاني و ندخل المارغرين مليح في الفرينة بالأصابع ما نعجنش و بعدها نضيف السكر و نخلط و بعدها الزيت و الحليب و صفار بيضة و نلم العجينة اذا حسيتيها جارية شوي زيدي شوي فرينة.
انا استخدمت المول الكبير ممكن تستخدمي انت هذوك ليمول الصغار المهم فتحت العجينة و مهم جدا انو ما تكونش رقيقة بزاف و بعدها جبت المول و قطعت به العجينة و درتها الداخل بعدما كنت دهنتو بالزيت و رشيت الفرينة و بعدها نثقب العجينة بالشوكة و نديرها في الفرن درجة حرارة 140 او 150 و تفقديها مرة على مرة اذا شفتيها طلعت من اي جهة عاودي ثقبيها بالشوكة.
نروحوا دك نجهزوا كرام باتيسيير :
اول حاجة نديروا الحليب يغلى و كي يغلى نحطو بجهة و نروح نجيب البيض و نشيف عليه السكر و الفاني و نضرب مليح بالشوكة حتى يتشكلو فقعات و نحس انو السكر ذاب نضيف بعدها المايزينة و نضربها حتى تتداخل في الخليط بعدها نضع الخليط على نار هادئة و نضيف الحليب و نحرك بالخف باش ما يطيبش البيض و هكذا حتى نكمل كامل الكمية و نقعد نحرك حتى يبدا يدير فقعات و تتكاثف
نولو دك للعجينة كي طيب بحيث تكتسب لون ذهبي من الفوق نحوها و نخلوها حتى تبرد و نحوها من المول و كذلك الكرام باتيسيير تكون بردت نعمر بها التارت و بعدها نجيب الفواكه انا استعملت الموز و العنب و نزين بها التارت كيما نحب و كي نكمل نمسح فوق الفاكهة بالناباج كلمة اخيرة و نحطها في الثلاجة
هاذ العجينة تاع التارت تبقى تتقرمش و تكون تارت بنينة كي طول في الثلاجة و بصحتكم
هاذ العجينة رائعة لكل وصفات التارت و الكيش
يسلمو يديك
بصحتكم
