عندي سؤال ياااريت تجاوبوني عليه
باذن الله رايحة نوجد فطور ل 25 شخص
حبيتكم تساعدوني في المقادير يعني
شحال نحتاج لحم للشربة
ودوزيام بلا رايحة ندير زيتون بالدجاج ثاني شحال نحتاج من كيلو زيتون ودجاج
ووووو
بالتفصيل حبيباتي ارجوووكن مانيش حابة نحشم روحي
يااااريت نلقى تفاعل
والله ما عندي فكرة
مالفة ب5 عباد
ان شاء الله يفيوك الاخوات
rabi ykon f 3awnk
ida bghiti nji n3awnk
اختي ربما استطيع مساعدتك مالفة بالعيلة في دارنا يعني رمضان نكونوا كامل في بيت وحدة كل اعمامي في بيت جدي ومالفة نطيب كمية كبيرة
اختي ننصحك اشري ذبيحة صغيرة جدي او خروف …..الضلوع ولا الشطوب ديري بيهم الشربة اقسميهم قطع صغيرة وديريهم كامل للشربة
والزيتون ديريه بلحم الباقي كيما حبيتي
واذا ماكش شارية شوفي اشري 2 كيلوا كوتلات ولا الشطوب كيما نسموها
وللزيتون اشري 3 كيلوا واشري معاه زوج دجاجات كبار ك تقسميهم ينحولك تقريبا 25 قطعة واذا ماكش حابة طيبي الجناوح والرقبة و و يعني غير الصدر و الافخاذ يلزمك اكثر بصح معليش طيبي كلش باه ما تخسريش روحك….لخاطر اذا كان ضيافك معظمهم رجالة راح ياكلوا مش زي النسا من التعب ما يكلوش
ومعباليش انت الزيتون ديريه وحدوا ولا لا لخاطر اذا كان وحدوا زيد رطل واذا راح ديري معاه الفطر يكفي
اختي وانا اذا حبيتي تاخذي برايي اشري ذبيحة صغيرة تكفيك وتجي الماكلة بنينة احسن وتقدري تشريها من عند الجزار مذبوحة ساجية من غير الاحشاء راح تكون ليك اقل سومة وتقدري ديري بزاف اطباق وتكفيك ويفضلك
وانت ورايك وميزانيتك
ربي يقدرك ان شاءالله ذاوت الخبرة يفيدوك
اليوم عندك العرضة؟؟؟ ما ظنيت يكفيك الوقت للشري و التوجاد و لاغدوة؟؟
المهم راني موالفة بالعرضات الكبار … فوق 10 ندير التشيشة و السفة و المصوَر مي مدامنا في رمضان يكون ثقيل
اول شي اصرفي بزيادة لوكان تبقالك في الفايدة خير ما تحصلي في الدقيقة التالية و بالاك يزيدولك ضيوف على غفلة
و ثاني شي 25 رجل و لا فيهم النساء؟؟؟؟ لانو كي تتقسم القعدة تزيد الكمية
التشيشة تديلك 2 كلغ لحم يكون ضلوع و لواحق الضلوع
الفريك كيلو الى كيلو و نص
رطل حمص كيلو طماطم طازجة 5-6 رؤوس ثوم و رطل بصل حسب وش موالفة طيبي…
الدجاج تحمريه ولا تقطعيه؟؟؟
تحتاجي 5 دجاجات بحساب لكل 5 اشخاص دجاجة
الزيتون يفضل لو ديريه مع champignon اذا ناوية ديريه وحدو 3 كغ الى 3 ونص تكفيك
فلفل و طوماطيش تحتاجي 1 كغ و رطل فلفل و 2 كغ طماطم
السلطة على حساب وش حابة تعملي دايما قدري قيس 5 اللي هي المتوسط و اضربيها في 5
البوراك تحسبي لكل شخص 3 بوراكات يعني 75 حبة ……. -ربي يعينك على اللوي و القلي نجي نعاونك-
تحتاجيلها 4 كغ و رطل لحم مرحي اشري البقري خير ارفق في السومة من الغنمي
احسن شي كفاكهة للمات الكبار salade de fruits و الا دلاع و بطيخ اصفر
مع القهوة ديري سنيوة قلب اللوز او قولي لمولا بيتك يشري و يهنيك – من الصباح و انتي تجري ثاني المعسلات… –
ربي يعينك اخيتو برك قوليلي وحدك ولا كاين اللي يعاونك؟؟
كاش ما تفكرت راني نقولك
احنا انديرو 2 كيلو لحم غنمي من الاحسن ايكون من الجيقو اذا حبيتي اتحمري وجهك او ما اجيش امشحمة بزاف ومدسمة الشربة واذا مكانش تقدري ايديري من الضلوع
الزيتون تحتاجي 2 كيلو او نص مع 3 دجاجات اذا درتي فقط الصدورة والفخاذتين او عاودي الدجاج يعد ماايطيب اما حمريه او اقليه
بصحتكم او ربي ايوفقك اختي
بارك الله فيكم على افادة والردود الطيبة
وزني ذهب وام عبد الرزاق وسلوى الجزائرية ربي يخليكم على الردود المفيدة خلاص اعتمدت 2 كلغ لحم للشربة والزيتون رايحة نشري لي كويس ديراكت ان شاء الله
والعرضة السمانة الجاية ان شاء الله ماش اليوم حبيت برك نحضر روحي
ربي يخليكم ليا ولا يحرمني منكن يا غاليات
وزني ربي يجازيك ديري لي البوراك وابعثيه لاني ماشكيتش نديرو راه عندي بيبي بالاك ندير بيتزا اسهل
والحلو قلت ندير بسبوسة من قبل بنهار