مشاركة في يوميات طفل صائم 2024.

هذا ولدي سميرعمرو 9 سنوات حب يجرب الصيام وصام اليوم الأول ناض تسحر شرب الحليب وكل ياؤورت ونوى الصيام ورقدت وكي ناض ماما عطشت شفت فيه وقتلو روح اشرب وخلاص ماشي راح تبداها من ضرك من ثم مسمعتش صوتو ههه وهكذا العب بالكمبيوتر والبلاسيتيشن وتفرج الرسوم وهذي لحكاية والساعة راهي الواحدة زوال وصلى الظهر وزاد ارقد في القايلة وبعد كي ناض صلى العصر وراح اشرالي من الحانوت وخرج لعب مع اولاد عمتو وكان شوي بدا يتعب وبان عليه الصيام وجهو اصفر وشواربو بيض وكان مثل الوردة الذابلة وهكذا كمل نهارو وكي أذن فطر وانا نحتملو في الماكلة كول هذي زيد من هاذي والحمد لله فات على خير وانا كنت خايفة عليه سيرتو كي خرج برا وهبط لتحت باش يروح يصلي مع جدو وكان جدو راح عليه ……..
وهذا كان اول يوم ليه
وبعد يومين ناض وهو قالي نوضيني نتسحر نوضتو وكي نوضتو مكانش قادر قالي خليني منتسحرش وكي ناض في الصباح دارلي سعدي في يدي وعلاه منوضتنيش حكيتلو وباباه قالو راهي تتمسخر بيك منوضتكش وزعف مني وانا شفتو نعسان غير كيما ارقد ياربي عندو ساعة ونصف وهاكا كمل الصايم بعناد وانا نترجى فيه يفطر وغدوة نوضك واصر في كلامو وتم وصراحة الي ميعجبنيش فيه كسول في صلاتو خليني من صليش وكنت نقولو ربي ميتقبلش صيامك بلا صلاة ولكن اختو كملت عليه كي تشوفو يقرا في المصحف تنحيهولو مخلتوش يقرا مسكين وزيد لعشية تقولو خرجني وهو ماشي قادر واااااااااااااع تولي تبكي علييا ونبدا وعلاه راك صايم لكان مصمتش راك خرجتها شوي هههه وهذي ذي يوميات لحد الأن صام اظن 5 ايام الحمد لله……
وكان كي يفطر يزبد يرجع كرسيه ويرفدلي الصحونة ويديهملي للكوزينة وكي يصوم منخليهش نشوف فيه ذابل وهو يقولي خلي برك انا الي نرفد هههه وانا نكمل البقية ويشرط علييا وعلى باباه هذا شوا وهذا اكرام وذا فلان منوع وهذي فلاش ودراهم ووووووو لقاها حاكمة ان شاء نكون مطولتش عليكم