رابع وصفة لنا هي محبوبة الشرق الشخشوخة
والطرق تختلف كثيرااا
لا تغادري قبل ان تضعي وصفتك 
وشكرااا مسبقاا
طريقتي
شخشوخة الظفر
جد مشهورة بالشرق و هي اكلة المناسبات و الضياف وسميت بالظفر لانها تقص بالاصابع مش بالموس كيما يفعل البعض الان بغية الاسراع
*طريقة حفظها
المهم حنا بعد ماتتشخشخ الشخشوخة(تتقص) نحمصوها قليلا في مقلة اوطاجين الفطير او النعمة و الغرايف او البغرير (المرا) ونحركوها بملعقة لوح
من بعد نفوروها ونحلوها في بلاتو مسطح ونخلوها تيبس في الهواء مع التحريك من يوم لاخر.
لما تيبس كامل نحطوها في كيس تع الكتان.وهكدا نحتفظ بها لاي مدة نحبوها لكن بعيدا عن الرطوبة ومع تهويتها من حين لاخر.
*تحضير المرق
زيت+بصل مفروم+ثوم مفروم+حبة طماطم مقطعة مكعبات+دجاج او لحم او الاثنين+توابل(تابل وكروية+فلفل عكري+الفاح التونسي+راس الحانوت+فلفل اسود)+ملح+طماطم مصبرة+هريسة
لما يتقلى الكل مليح نمرقها وكي تغلي نحط الحمص المرنخ ونخليها حتان يطيب اللحم تاعنا نحيوه بعدها على الجنب ونخليو المرق يخثار شوية.
*الشخشوخة
نحطو كمية الشخشوخة تعنا في كسكاس ونحطها تحت العين يجري الماء عليها باه تروح منها الغبرة و تتشمخ شوية مدة 1-2د فقط
بعدها نحلها في قصعة و نضيفلها شوية زيت (مثل الكسكس)باه تتحل وماتلكزش. ثم نفورها فوق المرق تحها احسن راح تتطرى ويفتاح لونها.
*طريقة طيابها
*من بعد لنا الاختيار اما نكمل نطيبها في الكسكاس بالتفوار ونضيفلها المرق المنحل فيه الزبدة
اما نحطوها في قدر اخر ونضع فوقها المرق (المصفى من البصل والحمصو…)حتى يغطيها وليس اكثر ونضعها فوق نار هادئة باه تتجمربلا مانحركوها بالملعقة بل نحرك القدر كامل حتى لا نفسد الحبات.
توضع في صحن التقديم وتزين بالحمص و الزبدة واللحم.
شخشوخة النعمة او الفطير
الفطير يطيب في طاجين خاص والعجينة تاعو لازم يعجن مليح عبارة عن دقيق+ملح وماء
ويطهى باستعمال الزيت كل مرة.
*تحضير المرق
في قدر نضع البصل المفروم+ثوم+حمص+طماطم مصبرة و لحم ودجاج +توابل وملح نمرق بماء ساخن ولما يطيب اللحم ننزعه من المرق ونضع الخضر بطاطا+جزر+جريوات مقطعين بالطول ومملحين ومتبلين بنفس التوابل السابقة.
*الفطير
من بعد الفطير نفوروه مرة واحدة ثم بسقى بالمرق المحضر ويزين بالخضر والحمص واللحم.
اولها نحط البصل ولحم ينقلاو مع ملح وتوابل اكيد ومن بعد نحط حبة طماطم مرحية وي تتقلا مليح نحط الحمص ونمرق وقفل عليهم وكي يعودقريب يطيبلحم نحط الخضراهم شيحبةجزر وحبة بطاطاهههههه ماتتخلعوش هاكدى نحبوها مرقة كسكسي وكوسا وملعقة طماطم مصبرة والحار
ونخليها طيب
والشخشوخة قبل لا تفور نديرلها زيت ونفورها المرة الاولة كيتفور نسقيها المرقة ونخليها شوي ونرجعها تفور تلات مرات نفورها انا مانحطهاش داخل المرقة كي تفور نديرلها الزبدة ونحطفوقها لحم الخضرة ونط جنبها المرقة متل الكسكي
ف جهتنا شخشوخة المناسبات اسمها النعمة
نديرو مرقة كيما قالت موون بصح الخضرة نديرو غير القرعة و ساعات حتى القرعة نملحوها و نديرولها فلفل اسود و نفوروها
و كي تطيب نسقيو الشخشوخة لي يقولولها ف مناطق الفطير كيما سطيف
انا طريقتي هي
نقلي البصل والثوم ثم نضيف الدجاج (انا نحبها بالدجاج)الجزر والحمص يتقلاو مليح مع التوابل ثم نضيف الطماطم المصبرة لازم تجي حمرة
ونمرق بالماء الساخن ونخليها تطيب
والشخشوخة (شخشوخة الظفر) نعملها شوية زيت ونفورها المرة الاولى ثم نشمخها بلاصوص ونزيد نفورها مرتين اخرين وكي تففور المرة الاخيرة نعملها الزبدة وكي تطيب الحم والجزر والحمص نصفيهم ونجمر الشخشوخة في لاصوص اناما نحبهاش تجي شايحة نخليها شوية فقط زايدة صوص ومن بعد نحطها في الصحن ونحط الحمص واللحم من فوق والجزر من الجوانب ونزينها بالبيض والزيتون الاسود
وشهية طيبة
انا ما نعرفهاش
بصح راني جاية عندكم لاازمة نتعلمها
و انتوما ف تلمسان واش هي اشهر اكلة ف المناسبات؟
