ساعدو جا رتي من فضلكم 2024.

تحية طيبة الى كل الاخوات .لانو فعلا اصبح المنتدى وعضواتو اسرتي الي نرتاحلها
هذه المشكلة تخص جارتي حبيبتي هي عندها انترنت بصح زوجها مانع عليها الاشتراك وهي راها تابع معانا في منتدانا وعاجبها واقترحت علي نطرح انشغالها لكم لعلها تجد الحل او تنفس عن نفسها من خلال ردودكم ومروركم الطيب .انشاء الله تعاونوها

المشكلة هي عاملة في بداية الحياة الزوجية كانو متفاهمين ومتعاونين ولكن بعد ما انجبت عيال كتب السكنة باسمها وواصبح يخبي راتبو وهي تصرف كل شي في الدار وهو رافض يعونها .كيما قالت هي مرات تلعن بليس وتصبر وتحتسب اجرها عند ربي ومرات يغيضها الحال وتداوس معاه ويكبر المشكل ويهددها وهي تخاف من الطلاق ومعاها عيال .المخلوقة وسوست .لما شاورتني انا قلتلها تصبر وتكبر اولادها وتتخيل انو مريض اومات المهم تخدم من اجل اولادها وتتاقلم مع الوضع واجرها عند ربي هذا رايي الخاص هياالاخوات هاتو ارائكم وجازاكم الله خيرا

هذا الانسان يا تري يصلى ؟ قريب من كلام الله ؟

واش نقولك اولا الله يهديه

كيما قلتيلها تصبر علا جال ولادها يعني كون لا سمح الله تطلق من عندو ولادها يضيعو وزيد تكون هيا الوحيده الي مسؤوله عليهم
يسما غير هيا هيا مكسبت والو
على الاقل هكا بذمت راجل العيون الراميه مراحش تكون عليها كيما راح تكون عليها كي تطلق من عندو

ولكن منقولوش لازم تم معاه هكا الواحد مش عارف طول عمرو
تظل تخبي وتقنط في روحها ثاني مش مليح
لازم تشوف حل بلاك يغيرو ولو ل 5 درجات
ياتري زوجها عصبي ؟

الله افرج عليها ولازم تصبر لأجل اولادها لأن المرأة المطلقة في بلداننا العربية ينظر اليها نظرة خاصة

الله يسخرلها زوجها وربي يهديه يارب
ويفرج كربتها
اولا الحمدلله انه كتب السكن باسمها هادي تحمد ربي عليا ليل ونهار يعني ديجا راهو دارلها حاجة مليحة ويمكن على هاداك ماهوش يحب يصرف ويمكن حاس بنقص لان البيت باسمها او مش حاس بامان ماتعرفي واش راه يخمم
وتاني الحمدلله انها راهي تخدم ماشاء الله تبارك الرحمن
اذا مايصرفش تصرف قدها وقد ولادها ويلا يحب حاجة بسيف عليه يروح يشريها كي تقطع عليه المصروف الا اذا تخاف يدير مشاكل هنا تريح راسها وتصرف واش راح دير غير تصبر وربي يعينها ويهديهولها ويسخرلها زوجها ان شاء الله
بصح حنونة والله ماشاء الله تبارك الرحمن راهي احسن من كتير نساء معليش تشوف الي اقل منها لو مايضربهاش اهم شي
وخليها تشعل كل وقت سورة القرة صدقيني عندها مفعول رهيب
وربي يهنيها ويهنيك حنونة

اولاحبيت نقول حاجة الزوجة عندما تكون تعمل زوجها عندو الحق في جزء من راتبها لأنها من المفروض تكون كل الوقت في خدمة بيتها وزوجها واولادها وإذا خرجت تعمل تعطي جزء من راتبها لزوجها وليس كل الراتب أنا من رايي يجلسو جلسة تفاهم وتحاور وليس تخاصم وعتاب ولوم ويتفاهمو على مبلغ معين تعطيه له كل شهر وهو إلي يصرف على الدار ما لازمش تولفو هي إلي تصرف راح يستحلى الأمر ويتخلى على مسؤوليته وممكن عندما كتبلها السكنة جعل مقابل ذلك أنها هي إلي تصرف لازم تفهمو أن قوامة الرجل ناقصة بدون إنفاق والزواج شركة بين الزوجين هي تديرها من الداخل وتجيب الأولاد وتربيهم وهو يتكفل بمصاريف الخارج ويساعدها في التربية كذلك هذا هو دين الإسلام وربي سبحانه يقول في القرآن الكريم :الرجال قوامون على النساء بما فضل الله بعضهم على بعض وبما أنفقوا من أموالهم…" والمقصود ـ والله أعلم ـ أن الرجال قائمون على أمر النساء بسبب الإنفاق والتوجيه، وهما واجبان على الزوج لزوجته، بما فضله الله عليها من قوة في الجسم وقدرة على تحمل المشقة والكد في سبيل كسب العيش والنفقة الواجبة على الزوج مقدّرة شرعاً بكفايتها من الطعام واللباس والسكن على قدر حال الزوج يساراً وإعساراً ، قال تعالى: ( لينفق ذو سعة من سعته ومن قدر عليه رزقه فلينفق مما آتاه الله)

وايضا ممكن راهو يخبي في الدراهم باش يشري سيارة او لأي مشروع وما راهوش حاب يخبر لأنووهناك نوع من الرجال يحب يعمل المفاجآت لاهلو لازم تعرف الدراهم وين راه يديرهم باسلوب ذكي لازم تفهمو أنها تحبو وتقدرو وما راهيش حابة تخلي أي شكوك تدخل في راسها لازم يقطع حبل وساوسها بسكين الصراحة وربي يجيب الخير وما تنسايش طمنينا عليه وسلمي عليها وقوليلها شدي في ربي سبحانه ومن يتق الله يجعل له مخرجا

ان نقولها احمدي ربي لي عطاك ما يصبرك و هو اولادك درك يجي النهار لي يكبرو او تكبر هي تاني و يكبر راجلها و يتنحى كل هاذا صدقيني تعود هي الامرة الناهيو هذي عن تجربة مرت بيها عمتي كانت راجلها حتى امها مايخليهاش تجيها او ترو حلها و كانت كل يوم تاكل ترية و اليوم راهي في نعمة و الحمد لله تبدل راجلها و اللي كانت متشوفش صواردوا ولا يعطيهملها تخبيهم ايه لا حال يدوم غير تصبر برك و نطلبو ربي يهديه

سلامي الحار وتحية احر لكل الاخوات اللي تفاعلو مع حبيبتي
والله العظيم فرحت كثير كثير لما قريت ردودكم ولمست فيه الصدق وخوف ربي والنصيحة لوجه الله وهذا اللي زاد من اعجابي وحبي لكم رغم اني لا ارى الوجوه ولكني احبكم احبكم وانتم اخواتي ….ربي يدوم المحبة فيه ….
والله جارتي رايحة تفرح واكيد تلق حل من خلالكم وانا رايحة ننقلها اقتراحاتكم ودعائكم وانشا الله ماتشوفو شر ولا ضيق في حياتكم .رايحة نرجعلكم باخبارها لاحقا
.واكرر هاكم قبلاتي وحبي ودمتم سعداء
ادعولنا بضهر الغيب اليوم الجمعة

كما قلتو لازم تصبر خصوصا وانو عندها ولاد وانا نضن ماكانش بيت يخلو من المشاكل خصوصا السيدات العانلات مساكن ا
فكل الرجال يعتبرو انهم عندهم الحق في راتب زوجاتهم يقولو احنى سمحنالك تخرجي وتخدمي لازم انتي تاني تفهمي روحك
ربي يصبرك ويهديلك زوجك ويخليلك اولادك
وحطي في بالك المقولة ادا عمت خفت وحاولي من مرة الى اخرى التحدث مع زوجك يمكن يجي نهار وتقدري تقنعيه بوجهة نضرك
وزيد راهو كتب الدار باسمك ونضن هدا حاجة تبشر بالخير
وربي يصبر ويعطيك طولت البال