وشراكم اخواتي نتمنى تكونوا كامل بخير
اسمحولي ندي شوية من وقتكم باش تخموا معايا وش ندير لبسة في عرسي
لانو عرسي رايح يكون شوية سبيسيال
منيش رايحة ندير عرس وتصديرة
بالاك تقولوا علاش ماديريش تصديرة
منيش رايحة نديرها لسببين
الاول لاني نشوفها غير خسارة دراهم ومنبعد يقعدوا الحوايج في الخزانة سيرتو اللي ماتخرجش بزاف للاعراس كيما انا
والثاني والاهم لانو عراسنا مش ملتزمين ويديروهم بالغنا وانا الحمد لله مانسمعش الغنا ومستحيل ندير عرس بالغنا وندي ذنوب كل وحدة حضرت عرسي
وكي نروح عند راجلي ثاني مانديرش تصديرة لانو هو ثاني ملتزم والحمد لله
ورايح يدير غير في الدار مع اقرب المقربين فقط
المهم حبيت ادبروا عليا وش نلبس باش نبدا نخيط من دوكا
انا نفهمكم كيفاش معولة ندير ونتوما قولولي وش نلبس
في دارنا
رايحة ندير عشا في الدار برك نعرض لافامي والاحباب قلت نلبس قفطان يكون مليح تاع تصديرة ونقعد بيه وش رايكم؟
ومنبعد في السهرة ندير الحنة وهنا منيش عارفة وش نلبس؟
هنا العرس تاع دارنا خلاص
عند راجلي
كي يجو يدوني بواش نروح في الكورتاج؟ مع العلم انو المسافة شوية طويلة حوالي 5 ساعات او اقل يعني لازملي حاجة مريحة شوية
قلت بالاك نلبس اللبسة اللي راهم يفتحو بيها التصديرة يعني تابور ابيض او روب بيضة قصيرة؟
وملفوق البرنوس طبعا نخرج بيه
كي نوصل ثما يعني دار عجوزتي (حتى هوما رايحين يديرو في الدار برك ) ونلقى ثما غير لافامي القراب كيما خالاتو ووو مكاش الغاشي
نقعد شوية ومنبعد نبدل
هنا وش تقترحو عليا نلبس؟ القفطان اللي لبستو في دارنا او حاجة اخرى؟
ونبقى بيه حتى لليل لانو اصلا ماناش رايحين نوصلو بكري
ومنبعد في الليل وش نلبس باش نروح لراجلي في حال اذا مادرتش الفستان الابيض؟
اسمحولي درتلكم حكاية طويلة وعريضة ههههههههه
بصح انا راهي تالفتلي وش ندير ولازم نقرر دوكا باش نريزارفي عند الخياطة
وعلابالي نتوما رايحين تعاونوني وتعطوني راي مليح
وشكرا مسبقا
طبعًا نحيك على عقلك وأخطيك من التبدير لا التصديرة أصلا لاتجوز من باب الإسراف طبعا
فداركم أشري قفطان خفيف ولا خليجية فالعشاء والحنة فرأي تقعدي تحني بيه
وكتروحي أخرجي بالكـــــراكو ولا قويط والحايك هكدا راهم يخرجو فرأي الكراكو مستور على الطايور تدخلي بيه مبعدا بدلي ولبسي القفطان الشباب الله الله وفلليل ألبسي يبقى السؤال المطروح ؟انا ملقيتش حل مرحش ندير الفستا ن الابيض
سيرتو مع انا رايحة لولاية وحدوخرة مليح لوكان نروح بحاجة تقليدية تاع ولايتي
بصح الكراكو سخون وانا لازملي حاجة مريحة الطريق طويلة والسخانة
والفستان الابيض وقيل مانديروش راني بين وبين
قلت على دقيقة برك وعلاش نخسر دراهمي ونكريه ومنبعد نلبسو دقيقة وانحيه
يعطيك الصحة مايا على الرد
وكي تلقاي وش تلبسي في الليل قوليلي ماتنساي اختك هههههههه
ربي يفرحك ومبرووووك مجددا
يبارك فيك اختي ولعقوبة ليك ان شاء الله
وربي يسهل نشوفو رأي البنات
اولا ربي يهنيك ويسعدك ويجمعكم بينكم بالخير
ثانيا تحية خااااصة على عقلك ورزانتك ربي يثبتك ويأجرك
ثالثا وهو الاهم حالتك تقريبا شبيهة بحالتي ههههههه
انا لبست في دارنا روبة سطايفي و كراكو فقط وفي الحنة لبست الفرقاني " قندورة قنسطينة " تاع اختي
وكي جاو يديوني لبست قفطان دوغي وبقيت به لليل لانو كان البرررد
ونصيحة مني كي يجيو يدوك ماتلبسيش حاجة قصيرة او مفتوحة بزاف لانو العروس دااايما الاعين عليها ويبداو يوصفوها وووو وناااهيك على الهواتف ولاو يصورو شفتهم بعيني يصورو بالتخبية على اهل العرس ربي يهدي الجميع
ربي يوفقك وديري عرس كما حابتو واهم شيء خالي من المنكرات يرضي المولى عزوجل
مي نلبس غير القفطان؟
صح القفطان موديلاااااااااااااااااااااااااااااااات يعني كي تخيري 2 انواع مثلا واحد تلبسيه في داركم وواحد في دار زوجك ملييح وسترة
انا حضرت لصاحبتي ملتزمة ودايرة جلباب شرات طايور ابيض وهو 3/4 خرجت به كي جاو يدوها وبقات تلبسو من بعد في الاعراس
