شوربة الارز بأجنحة الدجاج (م.م.ط.ر)

السلام عليكم ورحمة الله تعالى وبركاته

هاذي الشوربة نديروها بالاجنحة والاعناق تاع الدجاج
يعني كي تجيبي دجاجة وتطيبيها نحي الاجنحة والعنق وديريهم في الكونجيلاتور
منبعد تلقايهم لاعداد هاذي الشوربة اللذيذة

بسم الله
في قدر نحط الاجنحة والاعناق ونرابي حبة بصل وندير ملعقة زيت وملعقة سمن ونحطهم فوق نار هادية يتقلاو
في هاذي الاثناء نقطع حبة كورجات وحبة جزر الى مكعبات صغيرة ونحضر شوية حمص

الجيريا

نرجع للقدر نتاعي نضيف شوية ماء وملح والتوابل حسب الرغبة
فلفل اسود قرفة كركم
مثلا انا عندي المرضى في الدار نطيبلهم بدون توابل
استعملت الكركم فقط لانو صحي جدا وغير مضر
ونضيف الخضر نتاعي وشوية معدنوس مقطع رقيق
ونخلي الكل يتقلى ونضيف الماء كي نشوف القدر نتاعي بدا ينشف
كي يدخلهم الطياب نمرق بالماء الساخن
كي يولي يغلي ندير الروز
هنا كمية الروز على حساب كمية المرقة نتاعك
ونخليه يطيب على نار متوسطة مع التحريك بين الحين والاخر باش مايهبطش الروز
كي يطيب الروز وتثقال الشوربة نتاعي
نجيب حبة بيض نضربها ونعصرلها شوية قارص ونفرغها ملفوق
دقائق فقط ونطفي على القدر

وهاهي الشوربة نتاعي جاهزة
بنينة وصحية

الجيريا

بصحة وعافية
تقبل الله منا ومنكم صالح الاعمال

سلام عليكم ورحمة الله وبركاته
شربة صحية
بارك الله فيك
بصحتكم وبالتوفيق لك
اول مرة نتعرف على هذي الشربة
لذييييييذة وانا فاني نخبي الاجنحة ولعناق للحريرة والشربة في الفطر
شكراااااااااااااااااااا
بارك الله فيك وربي يشافي مرضاكم
بنينه بزاف مشكورة
الله يعطيك الصحة

شكلها يشهي
بصحتكم اختي موفقة ان شاء الله.
شكرااا اخواتي
بارك الله فيكن

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.