السلام عليكم و رحمة الله و بركاته
اتمنى لو يتم تثبيت الموضوع ممكن يفيد البعض
و انوه انو ليس منقول 
اخواتي الكريمات
المجاهدات و المناضلات في ميدان الحياة الاسرية
كيما نعرفو كامل انو المراة عندها بزاف انشغالات واهمها تنظيم المصروف اذا كانت هي المسؤولة
عليه كيما انقولو هي اللي حاكمة المصروف
اما اذا كانت مش هي المعنية بتقسيمو فارتاحت 
كيما قالت وحدة لراجلها انت اللي حاكم المصروف تجيب بطاطا تاكل بطاطا …تجيب بانان تاكل البانان
المهم يا بنات مش المهم شكون يحكم المصروف ..المهم المشاركة في تقسيمو و السؤال المطروح
هل راهو يخرجنا هذا التقسيم في اخر الشهر او لااااااااااااااااا 
كل واحد وش كتبلو ربي سبحانو المهم نحاولو نتفادو الكريدي و الدين على حاجة اللي قادرين نتحكمو
فيها ***بالرغم من اننا كلنا نتعرض للدين من اجل اشياء ضرورية في حياتنا*****
و نخبو حاجة للزمان و نديرو حساب كاش طوارئ ممكن تجينا ..الله يقدر الخير دايما…
واللي حاب طونوبيل و اللي حاب يوسع الدار و اللي حاب يبني
ربي يفرج علينا كامل و اللي فاتحها ربي عليه ما يبذرش ويدير حساب باللي حال الدنيا مايدومش
وزيد قال الله تعالى **ان المبذرين كانوا اخوان الشياطين***
شفتو الحكمة هههههههههههه 
جبتلكم طريقة ممكن تساعد الكثيرين باذن الله
انا مازال دايرتها طور الدراسة
لانني استنتجت انو المصروف ليس ثابتا و مش كيما تقسمي
نظريا تلقاي تطبيقيا لكن نحاولو الاجتهاد
يعني اللي عجبتها الفكرة تتناقش مع راجلها او والديها و تغيرو التقسيم على حساب الشهرية
وعلى حساب عدد الافراد
الفكرة بدات لقيتها عند اخت في منتدى اخر عطات افكار للاخوات في التقسيم بارك الله فيها
و عدلت الفكرة على حساب الظروف المهم هي صاحبة الفكرة
مش راح نحدد الشهرية كم ولكن راح نحدد شحال نصرفو
راح نهدر بالدينار الجزائري و اللي ما تفهمش المبلغ تزيدلو 00 يعني صفرين
عندنا الاظرفة enveloppes مقسمين
العاب بنات
mobilisالظرف الاول 4000 دج
* دايرين la clé لاننا عايشين في دشرة ماكانش ال adsl يعني 4000 دج كل شهرين الانترنت
قسمنا
كل شهر 2024 دج + la facture تاع061 تجي 3000 في الشهرين يعني 1500 كل شهر
هاتف المحمول تاعي500دج
الظرف الثاني transport
راجلي يخدم بعيد عندو حق ال voyage 3500 شهريا
الظرف الثالث viandes
اللحوم تاع الشهر كامل 4000 دج
كل خطرة وش تحبي تشري لحم غنمي..بقري..دجاج..مرقاز …دوارة ..المهم قسميه على 4000 لكل
الشهر يعني مثلا كل 15 يوم تشري ب 2024 دج
وهذا تقسيم الاخت صاحبة الفكرة
اللحوم و مشتقاتها كل 15 يوم يعني مرتين في الشهر 2 دجاجات + دماغ + 2 كيلو سردين +كيلو لحم + كيلو دوارة و هذي الكمية تكفيك 15 يوم و ساعات تتبقى وفي ال15 يوم الثانية نكمل دجاجة واحدة و كيلو لحم ورطل لحم مرحي
طبعا يتنظفواb1 و كل حاجة واحدها و على المجمد
وهنا هدرت على تفصيل اللحوم 
أنا نشري اللحوم بال 15 يوم 2 دجاجات و كيلو و نص حوت و دماغ و كيلو دوارة و الأسعار كالآتي 2 دجاجات ب 140 ألف و كيلو و نص حوت قريب 35 ألف و دماغ 50 ألف و كيلو الدوارة 40 ألف يعني المجموع 265 فقط نستعمل الحوت علة مرتين كل أسبوع مرة و نزود معاه فريت و طماطم مقلية بالثوم و خبز الدا و سلاطة و تاكلي أبهى أكل كذلك للدوارة نستعملها على مرتين مرة بلوبيا قرينيا و مرة بالحمص و و نهار ندير الدماغ و نهار شكشوكة من المخ تاع الدماغ و ما تنسوش عندنا 2 دجاجات نقسمها على سبعة 2 صدور كل صدر نعمل منه أكلة و 4 أفخاذ و 4 اللي تابع للفخذ و 4 جنحين و 2 ضلوع و 2 التحتاني أسفل الصدر ما نعرفش واش تسموه يعني تكفينا لسبعة أيام و ندير منهم أحلى أكل تتبقى الكبد و القوانص يجملو و ندير منهم كمونية أو حاجات أخرى كثير و تزيد طبق فوق الطاولة و بهذي الطريقة تاكلي باللحم لمدة 15 يوم و ب265 فقط
بالنسبة لل15 الأخرى يختلف الأمر ما نشريش نفس الحاجات
اتمنى افكارها تنفعكم ربي يجازيها و يجعل هذا في ميزان حسناتها
والان للظرف الرابع légumes et fruits
الخضر و الفواكه يا اخواتي كل اسبوع او 10 ايام او 15 يوم كل واحد و ظروفو
المهم 4000 دج للشهر يعني 1000 دج للاسبوع
يعني تقسميها على 4 تجيك مية الف
وهاذي هدرة الاخت كيفاش تشري الخضرة
النسبة للخضرة أسبوعيا و كيتطيح أنواع رخيصة نشري بالجملة en gros مع أختي تطلعلي أرخص و تتنضف و على المجمد مثل الجلبانة و لوبيا قرينيا و لوبيا ماشطو و القرنون و البروكلي و الفول و البصل ندير منه شكشوكة المحجوبة كمية مليحة و نطيبها و كي تبرد نقسمها لمجموعات و على المجمد
و الله هذي الفكرة وفرت علي مجهود كبير اليوم اللي نتشاهو المحجوبة نجبدها تطلق الثلج و نكون نوجد في العجين و نطيب تتوجد في أسرع وقت توفرلك المجهود و الوقت
لحد الان رانا صرفنا 15500دج يعني مليون و خمس مية و 50 الف
الظرف الخامس superette
يعني الرافيطايما تاع الشهر و حوايج الثلاجة
عندنا 6000 دج
يعني لحقنا ل 21500 دج يعني 2 ملاين ومية و 50 الف
بالنسبة لينا عندنا شهرية تاع 35000 دج
عندنا مليون نورمالمو ماراناش
حاسبينو تاعنا يعني نورمالمو ما نمسوهش ابداااااااااااااا
يعني حاسبين 2 ملاين و نصف هي الشهرية
و لحد الان صرفنا 2
ملاين ومية و 50 الف
يعني بقالنا 3500 دج هاذيك نحو منها حق
فاتورة الكهرباء و الماء و مصاريف لينا
وكانش طبيب ربي يعافينا جميعا
و اهم حاجة يا بنات الصدقة ..نحاولو قدر الامكان نجعلو للصدقة مكان في تقسيمنا
وكيما نعرفو حديث سيد الخلق صلى الله عليه و سلم ** ما نقصت صدقة من مال **
و بلا ما ننسو يا بنات نسمو اسم الله قبل ما نبداو نصرفو اي حاجة وندعو ربي يباركلنا في
رزقنا
وهذا يا بنات تقسيم اخر عطاتو لاخت اخرى ممكن يفيدكم
عندنا 3 ملاين و ميتين
الميتين خليها لفاتورة النت
و 3 ملاين جيبي أضرفة
الظرف الأول إكتبي عليه الأسبوع الأول و الثاني و الظرف الثاني تكتبي عليه الأسبوع الثالث و الرابع
كل ظرف تحطي فيه 700 ألف
يعني مليون و 400 في الظرفين وبقات مليون و 600 الف
تاخذي من الظرف 400 تشري منها الدجاج و اللحم تاع الأسبوعين و 300 للخضرة و الفواكه
يعني كل 700 الف تاع اسبوع
و المليون و ال600 اللي بقات
ال 600 ألف تنحي منها 220 للبورطابل و الفيكس تبقى 380 خليها للبواريك و مصاريفك الخاصة
يبقالنا المليون تشري منه للريفيطايمة
وهي طبعا تتفرق من عائلة لاخرى
كل وحدة دير حساب الكمية اللي تحتاجها في الشهر
وانا راح نجرب استراتيجية اخرى باذن الله لاني كيما قلت في اول الموضوع انو مازلت في طور
دراسة الميزانية
لقيت انو ممكن نشري الرافيطايما بالشهرين خطرة وحدة لانو لما نشرو بالشهر اكيد تتبقى حوايج في اخر الشهر لكننا مضطرين الى شراء نفس القضية لانو اللي بقا من الشهر اللي فات ما يكملش الشهر الثاني
والرافيطايما علابالكم ما تخسرش وكاين اللي تقدر تتشارك مع دارهم او مع دار راجلها ويشرو en gros وعلابالكم كلشي l gros يستقام ارخص 
مثلا الاومو تاع الحوايج نستهلكو الله يبارك هههههههه
الفرينة خير نتشاركو في شكارة تاع 25 كيلو من اننا نبقاو نشرو بالكيلو على 5الاف
المهم اللي تقدر توفر في حاجة لا تتردد
على خاطر تبانلك راح تربحي شوية برك لكن لا تستخفي بهاذاك المبلغ القليل ..شوية من هنا و شوية من هنا تجملي حق حاجة اخرى
ايضا الخضرة في موسمها باش نخبوها في الكونجيلاتور ..في وقت االطماطم مثلا اللي تقدر تتشارك
مع اختها او جارتها ربي ييسرلهم
وكي نشرو الرافيطايما يبقى حق الخضرة و اللحم اسبوعيا او كل 15 يوم
ويبقى حق الخبز و الحليب وحدهم و الصرف تاعهم اجمليه اشري بيه حاجة لولادك 
واقتصدي حق الخبز و اعجني ساعة على ساعة ..
المهم عودة للائحة القضية
نقسموهم
قضية البلاكار
الزيت/السميد الرفيع/السميد المتوسط/الفرينة/السمن/الملح/السكر/الطماطم المصبرة/العدس /اللوبيا/الpois cassées/ اللحظة /القهوة او النسكافيه /الخل/ الفلان /خميرة الخبز/الارز/المقرونة/السباغيتي/المقرونة بانواعها كل واحد وش يخير /شوربة/ محمصة /كسكسي/جامبو/التون/شامبينيوchampignons / و لوازم صنع الحلويات وحدهم كل وحدة وش تحب /مايزينة..خميرة..كاوكاو..نواد كوكو..ماء الزهر ..الخ
ممكن نكون ناسية حوايج تفكروهم و قولولي
قضية الثلاجة …..انتبهو لتاريخ الصلاحية
البيض/الديول/الجبن ..كل وحدة وش تشري على حساب البرنامج/الياوورت/العصائر/المارغرين و الزبدة /creme fraiche /المربى/المخللات /الزيتون الاخضر و الاسود/الشوكولاطة
زيدو فكروني
المنظفات و لوازم الاستحمام
اومو الماشينة/ اومو الغسيل باليد/صابون غسل اليد دوركس هههه/صابون الاستحمام لوكس و البالموليف ههههههههه/ صابون الحجرة /ايزيس السائل للاواني/ الجافيل/ صانيبون/معطر الجو/العنبر/lavette اللي نغسلو بيهم المواعن /النشافة حاشاكم /طرشونة البوطاجي / الفوط النسائية/+ protege /الشامبو /البلسم / واللي حابة الماسك تشريه بمصروفها الخاص ممنوع من الرافيطايما 
/ معجون الاسنان /المناديل الورقية
زيدو فكروني 
هكدا نحطو مبلغ كبير خطرة وحدة و نخبو الباقي نقسموه على واش بقى
والان باقي لائحة الوجبات
علابالي باللي كل واحد وش يطيبوكل واحد و عاداتو الله يبارك الجزائر غنية بالعادات و التقاليد المتنوعة بين جهاتها الاربعة
المهم انا عندي لائحة ببعض الاكلات و اكيد كاين الاكلات اللي نجربو فيها من خبرات الاخوات وكاين وصفات نشوفوها في الانترنت و التلفاز
كسكسي بانواعو
حبوب
ملوخية
ارز بالصوص او غراتان او كويرات وش حبيتو
مرقة او جواز اي نوع
محاشي او دولمة تاع اصحاب الوسط
جلبانة مرقة
شوربة فريك او فيرميسال بيضة او حمراء او تشيشة
اي نوع تاع حساء
بيتزا
محجوبة
مقرونة /سباغيتي/تليتلي/ثريدة/شخشوخة/لازانيا
purée
غراتان اي نوع
زيتون مرقة او دولمة عند صحاب الشرق
حميص
الخ الخ الخ
بزاف ماكلات الله يبارك شاطرات 
المهم قصدي كل وحدي فينا دير حساب وش حاب طيب مدة سمانة مثلا باجتماع اراء كل العائلة
وبناءا على هذا يتبين واش تشري للثلاجة في هاذيك السمانة
خلاصت هدرتي يا حلوات
نتمنى الموضوع يكون عجبكم و تقدرو تستفادو ولو بقليل من التجارب اللي طرحتها و الافكار
انا كيما قلتلكم مازال ماخرجتش على قانون رسمي للمصروف لانني مازال ما توفقتش باش نطبق البرنامج اللي رانا دايرينو راني نخرج شوية على القانون لكني اجتهد
ربي يوفقنا جميعا لما يحب و يرضي ومانكونوش من المسرفين او مقترين يعني بخلاء لازم نكونو وسطيين معتدلين
تقبلو تحيات اختكم حكيمة
هكذا نتناقشوا و نستفادو من بعضانا
طرحتِ فأبدعتِ
الفواتير. مادا بي نكون حكيمة باه مع الوقت نديرو دارنا … لكن هو يقولي دايما الدراهم ندارو باه نصرفوهم ماش
نخبيوهم. و بشهريتي نقدر نبقى نكري طول عمري ,هو يهمو راحة البال. المصروف راهو عليه
يقضي مرة يجيب الخضرة و زيت و دقيق و دجاج او لحم و قاطو الفطور و زيتون و فروماج ,,, و كل يوم مع العشية
يجيب القازوز ويقولي وش خص؟
ف الحق يجيب كلش وحده و كي تفض حاجة كيما سكر و ملح يجيبها مع العشية
زيدو؟؟؟
الفواتير مين يوصلو يسلكهم
الحمد لله
لكن تاع نخبيو ماكنش عندنا, و مشكلتي تاني كي نحب حاجة لي كوسمتيك او ملابس منعرفش نقولو جيبلي
وانا منخرجش ونحب لوكان نشريهم وحدي لانو ذوقي صعيب ….
كما تفضلتي اختي كاين حاجات بزااف من الاحسن نشروهم من سوق الجملة انا في داري الحق مانديرهاش لاننا في قليل ولكن بيت اهلي ديما هكذا يقضيو يروح الوالد ربي يحفظو لسوق الجملة ويشري الروز واللوبيا والحمص والعدس بشكاير وهذو مايفسدوش حطيهم في بلاكار يبقاو لك مدة طويلة حتى 6 اشهر
وايضا يشري بدون تاع زيتون اخضر وكرطون زيتون اسود سعرهم ارخص بكثير من انك تشري بكغ
الزيت السكر القهوة الاومو الصابون الفرينة السميد كلهم تقدري تشري بالكارطون وتخبيهم مايصرالهم والو وفي نفس الوقت رايحة تقتصدي دراهم تحتاجيهم يوما ما
بارك الله فيك اخيتي وتبقى الميزانية هي محيرة الاسرة الجزائرية خاااااااصة مع ارتفاع الاسعار يعني كل يوم نلقاو حاجة زادولها ربي يبارك لنا ويفرج على كل محتاج
صح يا ختي عندك الحق حليب اللحظة ياكل الدراهم بزااااااااااااااااااااااااف بصح كاين اللي يحب يشرب غير اللحظة و زيد خااااااااااااااااااثرة هههههههههه يعني وش يكفي لحظة
ربي يحفظلك ولادك ويبارك فيهم والحليب راهو مليح لكل فترة من فترات الانسان من الصغر للكبر واذا شفتي ساعات حليب الشكارة يجي خفيف زيديلو مغارف لحظة يجي مليح
شكرا عالتفاعل
اختي ربي يحفظلك الوالد و يقدرو على ظروف المعيشة و الواحد قد ما يعيش يزيد يتعلم
و كيما قلتي الجملة تعاون بزاااااااااااااااااااااااف
شكرا ليك عالتفاعل
احسنتي
مرحبا حبيت نشارك في هذا الموضوع مع غلاء المعيشة صرت نعمل ألف حساب للدينار قبل ما يخرج من جيبي استتغنيت عن الفوطات الورقية واستعملت المناديل القماشية، واستعنين عن حلويات اللمجة لاطفالي وعوضتها بالفواكه، استعنيت عن معطر الجو وعوضته بتهوية البيت جيدا ووضع قشور البرتقال والليمون على الرادياتور